திருக்கழுக்குன்றப் திருப்பதிகங்கள் - சுந்தரர்

த்

சுந்தரர் பதிகம் & பாடல்

திருச்சிற்றம்பலம்

திருமுறை : 7/93        பண் : பழம் பஞ்சுரம்

கொன்று செய்த கொடுமையால் பலசொல்லவே

நின்ற பாவவினைகள் தாம்பல நீங்கவே

சென்று சென்று தொழுமின் தேவர்பிரானிட்ம்

கன்றினோடு பிடிசூழ் தண்கழுக் குன்றமே.           1

இறங்கிச் சென்று தொழுமின் இன்னிசைபாடியே

பிறங்கு கொன்றைச் சடையன் எங்கள் பிரானிடம்

நிறங்கள் செய்த மணிகள் நித்திலம் கொண்டிழி

கறங்கு வெள்ளை அருவி தண்கழுக் குன்றமே.   2

நீளநின்று தொழுமின் நித்தலும் நீதியால்

ஆளும் நம்ம வினைகள் அல்கி அழிந்திட

தோளும் எட்டும்  உடைய மாமணிச் சோதியான்

காளகண்டன் உறையும் தண்கழுக் குன்றமே.      3

வெளிறுதீரத்தொழுமின் வெண்பொடி ஆடியை

முளிறிலங்கு  மழுவாளன் முந்தி உறைவிடம்

பிளிறுதீரப் பெருங்கைப் பெய்மதம் மூன்றுடைக்

களிறினோடு பிடிசூழ் தண்கழுக் குன்றமே.            4

புலைகள்தீரத் தொழுமின் புன்சடைப் புண்ணியன்

இலைகொள் சூலப்படையன் எந்தை பிரானிடம்

முலைகளுண்டு தழுவிக் குட்டியொடு முசுக்

கலைகள் பாயும் புறவின் தண்கழுக் குன்றமே.     5

மடமுடைய அடியார் தன்மனத்தே உற

விடமுடைய மிடறன் விண்ணவர் மேலவன்

படமுடைய அரவன் தான்பயிலும் இடம்

கடமுடைய புறவின் தண்கழுக் குன்றமே.              6

ஊனமில்லா அடியார் தன்மனத்தே உற

ஞானமூர்த்தி நட்டாடி நவிலும் இடம்

தேனும் வண்டும்  மதுவுண்டு இன்னிசை பாடியே

கானமஞ்சை உறையும் தண்கழுக் குன்றமே.           7 

அந்தமில்லா அடியார் தம்மனத்தே உற

 வந்துநாளும் வணங்கி மாலோடு நான்முகன்

சிந்தைசெய்த மலர்களும் நித்தலும் சேரவே

கந்தம்நாறும் புறவின் தண்கழுக் குன்றமே.                8

 பிழைகள் தீரத் தொழுமின் பின்சடைப் பிஞ்சகன் 

குழைகள்காதன் குழகன் தானுறையும் இடம்

மழைகள் சாலக்கலித்து நீடுயர் வேயவை

குழைகொள் முத்தம் சொறியும் தண்கழுக் குன்றமே.  9

பல்லில் வெள்ளைத் தலையன் தான் பயிலுமிடம்

கல்லில் வெள்ளை யருவித் தண்கழுக் குன்றினை 

மல்லில் மல்கு  திரள்தோள் ஊரன் வனப்பினால்

சொல்லல் சொல்லித் தொழுவாரைத் தொழுமின்.         10  

திருஇடையாறு  

திருமுறை : 7/77        பண் : கொல்லி / பழஞ்சுரம்

பாடல் எண் : 4

கச்சையூர் காவங் கழுக்குன்றம்  காரோணம் 

பிச்சையூர் திரிவான் கூவூர் வடபேறூர்

கச்சியூர் கச்சிக்கல் நெய்த்தானம் மிழலை 

இச்சையூர் எய்தமான் இடையாறு இடைமருதே.